
नेपालमा इलेक्ट्रिक सवारीको आयात बढ्दो क्रममा देखिएको छ । अघिल्लो आर्थिक वर्ष २०७८÷७९ को तुलनामा गत आर्थिक वर्ष २०७९-८० मा इलेक्ट्रिक कारको आयात दुई गुणा भन्दा बढीले बढेको हो ।
भन्सार विभागको तथ्यांक अनुसार गत आवको असार मसान्तसम्म ४ हजार ५० यूनिट इलेक्ट्रिक कार नेपाल भित्रिएको छ । अघिल्लो आवमा १ हजार ८०७ यूनिट इलेक्ट्रिक कार नेपाल आएको थियो । अघिल्लो आवको तुलनामा गत आवमा इलेक्ट्रिक कारको आयात २ हजार २४३ यूनिट अर्थात १२३.९८ प्रतिशतले बढेको छ ।
इलेक्ट्रिक कारको संख्यासँगै आयात रकम पनि दुई गुणाले बढेको छ ।
गत आवमा ११ अर्ब ८४ करोड ८ लाख ९५ हजार रुपैयाँ बराबरको इलेक्ट्रिक कार आयात भएको छ। अघिल्लो आवमा ५ अर्ब ३२ करोड ५ लाख ५० हजार रुपैयाँ बराबरको इलेक्ट्रिक कार आयात भएको थियो । अघिल्लो आवको तुलनामा गत
आवमा ६ अर्ब ५२ करोड ३ लाख ४५ हजार रुपैयाँले आयात बढेको छ ।
गत आवमा इलेक्ट्रिक कारको आयातबाट सरकारले ३ अर्ब ३० करोड ४४ लाख ८७ हजार रुपैयाँ राजश्व प्राप्त गरेको छ ।
नेपालमा चीन, भारत, इन्डोनेसिया, दक्षिण कोरिया र अमेरिकाबाट इलेक्ट्रिक कार आयात हुने भन्सार विभागको तथ्यांकमा देखिन्छ ।
नेपालमा सबैभन्दा बढी इलेक्ट्रिक कार भारतबाट भित्रिएको भन्सार विभागको तथ्यांकमा देखिन्छ । गत आवमा भारतबाट २ हजार २७७ यूनिट इलेक्ट्रिक कार नेपाल ल्याइएको छ ।
चीनबाट १ हजार ३७१ यूनिट इलेक्ट्रिक कार आयात भएको छ ।
दक्षिण कोरियाबाट ३८१ यूनिट, इन्डोनेसियाबाट ११ यूनिट र अमेरिकाबाट १० यूनिट इलेक्ट्रिक कार नेपाल आयात भएको भन्सार विभागको तथ्यांकमा उल्लेख छ ।